ایران نے امریکا کی کچھ تجاویز پر اتفاق کر لیا ، ترجمان وائٹ ہاؤس کا دعویٰ

وائٹ ہاؤس کی ترجمان کیرولین لیوٹ نے دعویٰ کیا ہے کہ ایران نے نجی بات چیت کے دوران امریکا کی کچھ تجاویز پر اتفاق کر لیا ہے۔

پریس بریفنگ میں انہوں نے بتایا کہ ایران سے جنگ کے سلسلے میں بات چیت مثبت انداز میں جاری ہے اور 4 سے 6 ہفتوں کی ٹائم لائن برقرار ہے۔ کیرولین لیوٹ نے کہا کہ ذاتی طور پر ہونے والی بات چیت اور عوامی بیان میں فرق ہوتا ہے، اور ایران نے جو بات ذاتی طور پر کہی ہے اسے جانچا جائے گا۔

انہوں نے مزید کہا کہ صدر ٹرمپ عرب ممالک سے جنگ کے اخراجات میں تعاون طلب کر سکتے ہیں اور دورہ چین میں کابینہ کے حکام بھی شامل ہو سکتے ہیں۔ امریکا ایران کی جانب سے آبنائے ہرمز پر ٹول ٹیکس لینے کی حمایت نہیں کرتا، جبکہ توقع ہے کہ آئندہ چند روز میں وہاں سے بیس ٹینکرز گزریں گے۔

امریکی صدر ٹرمپ چاہتے ہیں کہ ایران معاہدہ چھ اپریل کی ڈیڈلائن سے پہلے طے پا جائے۔