نیتن یاہو کا اسرائیلی فوج کو جنوبی لبنان میں مزید زمینوں پر قبضے کا حکم

اسرائیلی وزیراعظم بنجمن نیتن یاہو نے جنوبی لبنان میں نام نہاد “سیکیورٹی زون” کو مزید وسعت دینے اور لبنانی زمینوں پر قبضے کا باضابطہ حکم دے دیا ہے۔ برطانوی نشریاتی ادارے کے مطابق، نیتن یاہو نے اسرائیلی فوج (آئی ڈی ایف) کی شمالی کمان کے ہیڈکوارٹر کے دورے کے دوران واضح کیا کہ اس اقدام کا مقصد حزب اللہ کی دراندازی کو روکنا اور اینٹی ٹینک میزائلوں کی پہنچ کو سرحد سے دور دھکیلنا ہے۔

اسرائیلی وزیرِ دفاع اسرائیل کاٹز نے اس حوالے سے مزید سخت موقف اختیار کرتے ہوئے کہا ہے کہ اب یہ بفر زون دریائے لیطانی تک پھیلا دیا جائے گا۔ اس منصوبے کے تحت لبنان کا تقریباً دسواں حصہ اسرائیلی کنٹرول میں آ جائے گا، اور کسی بھی لبنانی شہری کو اس وقت تک اپنے گھروں میں رہنے کی اجازت نہیں ہوگی جب تک حزب اللہ کا خطرہ مکمل ختم نہیں ہو جاتا۔ یہ صورتحال 1985 سے 2000 تک کے اس دور کی یاد دلاتی ہے جب اسرائیل نے جنوبی لبنان پر طویل عرصہ قبضہ برقرار رکھا تھا۔

اسرائیلی پیش قدمی کے دوران حزب اللہ اور اسرائیلی افواج کے درمیان شدید جھڑپیں بھی جاری ہیں۔ آئی ڈی ایف نے حالیہ کارروائیوں میں حزب اللہ کے کئی ارکان کی ہلاکت کا دعویٰ کیا ہے، جبکہ اسرائیل نے اپنے پانچویں فوجی کی ہلاکت کی بھی تصدیق کر دی ہے۔ عالمی مبصرین اس اقدام کو لبنان کی خودمختاری کی سنگین خلاف ورزی اور خطے میں جنگ کو مزید طول دینے کی کوشش قرار دے رہے ہیں۔