قونصل جنرل کی قاری صداقت علی سے ملاقات، “پیغامِ پاکستان” کے ذریعے امن کے فروغ پر تبادلہ خیال

پاکستان کے قونصل جنرل عامر احمد اتوزئی نے معروف مذہبی اسکالر قاری سید صداقت علی سے اپنے دفتر میں ملاقات کی۔

ملاقات کے دوران قاری صداقت علی نے اپنے پروگرام “پیغامِ پاکستان” کے اغراض و مقاصد اور اس کے دائرہ کار سے قونصل جنرل کو آگاہ کیا۔ انہوں نے بتایا کہ یہ پروگرام معاشرے میں امن، اتحاد اور بین المذاہب ہم آہنگی کے فروغ کے لیے اہم کردار ادا کر رہا ہے۔

قاری صداقت علی کے مطابق پروگرام کے ذریعے مثبت مکالمے کو فروغ دیا جا رہا ہے، جس کا مقصد ایک تعمیری قومی بیانیہ تشکیل دینا ہے۔ انہوں نے کہا کہ اس پلیٹ فارم کے ذریعے نوجوانوں میں شعور، برداشت اور مثبت سوچ کو اجاگر کیا جا رہا ہے۔

قونصل جنرل عامر احمد اتوزئی نے ان کوششوں کو سراہتے ہوئے کہا کہ ایسے اقدامات معاشرتی ہم آہنگی کو مضبوط بنانے اور مثبت اقدار کے فروغ میں کلیدی کردار ادا کرتے ہیں۔