ریپر سے سیاستدان بننے والے 35 سالہ بلیندرشاہ نیپال کے وزیراعظم بن گئے

کٹھمنڈو: نیپال کی سیاسی تاریخ میں ایک بڑا الٹ پھیر دیکھنے میں آیا ہے جہاں ریپر سے سیاستدان بننے والے 35 سالہ بلیندر شاہ ملک کے نئے وزیراعظم بن گئے ہیں۔ غیر ملکی خبر ایجنسی کے مطابق، بلیندر شاہ نے بدعنوانی کے خلاف جاری شدید عوامی احتجاج اور سیاسی بحران کے بعد ہونے والے انتخابات میں تاریخی کامیابی حاصل کی ہے۔ انہوں نے تجربہ کار سیاستدان اور سابق وزیراعظم کے پی شرما اولی کو شکست دے کر دنیا کے کم عمر ترین وزرائے اعظم کی فہرست میں اپنا نام درج کروا لیا ہے۔

بلیندر شاہ کی جماعت، راشٹریہ سواتنترا پارٹی نے پارلیمنٹ میں بھاری اکثریت حاصل کی ہے۔ واضح رہے کہ بلیندر شاہ اس سے قبل کٹھمنڈو کے میئر رہ چکے ہیں، جہاں انہوں نے اپنی ریپ موسیقی اور سوشل میڈیا کے ذریعے نوجوان نسل (Gen Z) میں بے پناہ مقبولیت حاصل کی۔ ان کا کرپشن کے خلاف سخت مؤقف اور روایتی سیاست سے ہٹ کر اندازِ بیاں ان کی جیت کی اصل وجہ قرار دیا جا رہا ہے۔

دوسری جانب، شکست خوردہ سابق وزیراعظم کے پی شرما اولی کے لیے مشکلات میں مزید اضافہ ہو گیا ہے۔ انہیں ‘جین زی’ (Gen Z) کے حالیہ مظاہروں کے دوران مظاہرین کی ہلاکتوں اور طاقت کے وحشیانہ استعمال کے الزامات میں گرفتار کر لیا گیا ہے۔ نیپال کے سیاسی ماہرین کا ماننا ہے کہ بلیندر شاہ کا اقتدار میں آنا خطے میں نوجوان قیادت کے ابھرنے اور روایتی سیاسی ڈھانچوں کے خاتمے کا ایک واضح اشارہ ہے۔