اقوام متحدہ کا ایران میں گرلزاسکول پرامریکی حملے کی جلدتحقیقات کامطالبہ

اقوام متحدہ کے انسانی حقوق کے کمشنر وولکر ترک نے جنوبی ایران کے علاقے مناب میں لڑکیوں کے اسکول پر امریکی حملے کی جلد سے جلدتحقیقات کا مطالبہ کیا ہے۔

ایرانی حکام کے مطابق مناب میں اسکول پر حملے میں 168 افرادشہید ہوئے تھے جن میں زیادہ تربچیاں تھیں۔

امریکی  میڈیا کے مطابق امریکی فوجی تفتیش کاروں کا خیال ہے کہ ممکنہ طور پر امریکی فورسز اسکول کو غیر ارادی طور پر نشانہ بنانے کی ذمہ دار ہیں تاہم وہ کسی حتمی نتیجے پر نہیں پہنچے ہیں۔

اقوام متحدہ کی انسانی حقوق کونسل میں تنازعات میں بچوں کے تحفظ کے بارے میں ہونے والی بحث کے دوران کمشنر وولکر ترک  کا کہنا تھا کہ اب یہ حملہ کرنے والوں کی ذمہ داری ہے کہ وہ اس کی  فوری، غیرجانبدارانہ اور شفاف تحقیقات کریں تاکہ مکمل حقائق کا تعین کیا جا سکے اور جوابدہی کے لیے بنیاد قائم کی جا سکے۔ان کا کہنا تھا کہ اس بات پر تو ہم سب ہی متفق ہو سکتے ہیں کہ ا سکول کے بچوں کو مارنے سےاختلافات حل نہیں ہوں گے۔