روس کی درخواست پر سلامتی کونسل کا ایران جنگ پر بند کمرہ اجلاس آج طلب

نیویارک/تہران: روس کی درخواست پر اقوام متحدہ کی سلامتی کونسل نے ایران کی صورتحال پر آج ایک اہم بند کمرہ اجلاس طلب کر لیا ہے۔ خبر ایجنسی کے مطابق، اس اجلاس میں ایران کی شہری تنصیبات پر امریکہ اور اسرائیل کے حملوں کا معاملہ زیرِ بحث آئے گا۔ دلچسپ بات یہ ہے کہ سلامتی کونسل کی موجودہ صدارت امریکہ کے پاس ہے، جبکہ روس نے سویلین علاقوں کو نشانہ بنانے کے اقدام کو ایجنڈے میں شامل کرنے کا مطالبہ کیا ہے۔
ادھر ایران میں امریکی اور اسرائیلی فضائی حملوں کا سلسلہ جاری ہے۔ ایرانی شہر قم میں 3 گھروں پر بمباری کے نتیجے میں 6 افراد شہید ہو گئے ہیں۔ تشویشناک اطلاع یہ بھی ہے کہ تہران میں پاکستانی سفارت خانے اور سفیر کی رہائش گاہ کے قریبی علاقوں میں بھی شدید بمباری کی گئی ہے، جس سے سفارتی حلقوں میں کھلبلی مچ گئی ہے۔
مشرقِ وسطیٰ کی اس سنگین صورتحال پر عالمی وزرائے خارجہ کے بیانات بھی سامنے آئے ہیں:
روس: وزیر خارجہ سرگئی لاوروف نے امریکی رویے کو ‘خطرناک’ قرار دیتے ہوئے کہا کہ امریکہ مذاکرات کے لبادے میں جارحیت کر رہا ہے، جیسے اس نے پہلے عراق اور شام کو تباہ کیا۔
چین اور کینیڈا: چینی وزیر خارجہ وانگ یی اور کینیڈین وزیر خارجہ انیتا آنند نے ٹیلی فونک رابطے میں طاقت کے استعمال کی مخالفت کرتے ہوئے ایٹمی مسئلے کو مکالمے سے حل کرنے پر زور دیا۔
جرمنی: جرمن وزیر خارجہ نے آبنائے ہرمز کی ممکنہ بندش پر تشویش ظاہر کرتے ہوئے اسے عالمی معیشت کے لیے تباہ کن قرار دیا اور نیٹو اتحادیوں کے ساتھ مشترکہ موقف اپنانے کی ضرورت پر زور دیا۔