ایران نے خیرسگالی کے تحت آبنائے ہرمز سے 10 جہازوں کو گزرنے کی اجازت دی ، صدر ٹرمپ کا دعویٰ

ڈونلڈ ٹرمپ نے دعویٰ کیا ہے کہ ایران نے جذبۂ خیرسگالی کے تحت آبنائے ہرمز سے دس تیل بردار جہازوں کو گزرنے کی اجازت دی، جسے انہوں نے ایک تحفہ قرار دیا ہے۔

کابینہ اجلاس کے دوران گفتگو کرتے ہوئے امریکی صدر نے کہا کہ ایران کے اس اقدام سے ظاہر ہوتا ہے کہ وہ مذاکرات کے معاملے میں سنجیدگی دکھا رہا ہے۔ ان کے مطابق پہلے آٹھ جہازوں کو گزرنے کی اجازت دی گئی، جس کے بعد ایران نے ماضی کے ایک معاملے پر معذرت کرتے ہوئے مزید دو جہازوں کو بھی راستہ دیا، یوں مجموعی تعداد دس ہو گئی۔

برطانوی نشریاتی ادارے کے مطابق ٹرمپ نے یہ بھی کہا کہ انہیں ایک معتبر صحافی نے اطلاع دی کہ اس نے آبنائے ہرمز میں آٹھ جہاز گزرتے دیکھے، جن پر ممکنہ طور پر پاکستانی پرچم لہرا رہا تھا۔ اس پر انہوں نے کہا کہ اس سے ظاہر ہوتا ہے کہ درست فریقین سے بات چیت جاری ہے۔

صدر ٹرمپ کے بیان کو خطے میں جاری کشیدگی کے تناظر میں اہم پیش رفت قرار دیا جا رہا ہے، جہاں تیل کی ترسیل اور سمندری راستوں کی سیکیورٹی عالمی توجہ کا مرکز بنی ہوئی ہے۔