نیویارک پولیس ہیڈکوارٹرز میں یومِ پاکستان کی تقریب، پاکستانی سفیر اور قونصل جنرل کی شرکت

نیویارک: امریکا میں پاکستان کے سفیر رضوان سعید شیخ اور نیویارک میں پاکستان کے قونصل جنرل عامر احمد آتوزئی نے نیویارک پولیس کے مرکزی دفتر میں منعقدہ یومِ پاکستان و یومِ قراردادِ پاکستان کی تقریب میں شرکت کی۔

یہ تقریب پاکستانی نژاد قانون نافذ کرنے والے اہلکاروں کی تنظیم کی جانب سے منعقد کی گئی، جس میں پولیس کے اعلیٰ حکام، افسران، پاکستانی نژاد اہلکاروں، ان کے اہلِ خانہ اور کمیونٹی کی نمایاں شخصیات نے بڑی تعداد میں شرکت کی۔ تقریب میں قومی و ثقافتی اقدار کو بھرپور انداز میں اجاگر کیا گیا۔

تقریب سے خطاب کرتے ہوئے سفیر رضوان سعید شیخ نے نیویارک میں خدمات انجام دینے والے پاکستانی نژاد پولیس اہلکاروں کی پیشہ ورانہ صلاحیتوں اور امن و امان کے قیام میں ان کے کردار کو سراہا۔ انہوں نے کہا کہ یہ اہلکار نہ صرف اپنی ذمہ داریاں احسن طریقے سے نبھا رہے ہیں بلکہ پاکستان میں فلاحی سرگرمیوں کے ذریعے اپنے وطن سے مضبوط تعلق کا اظہار بھی کرتے ہیں۔

قونصل جنرل عامر احمد آتوزئی نے اپنے خطاب میں کہا کہ پاکستانی نژاد افسران نیویارک میں قانون کی بالادستی اور کمیونٹی کے درمیان ہم آہنگی کو فروغ دینے میں اہم کردار ادا کر رہے ہیں۔ انہوں نے کہا کہ یہ افراد پاکستان کی ثقافت اور مثبت تشخص کو عالمی سطح پر اجاگر کر رہے ہیں۔

تقریب میں پاکستانی نژاد افراد کی خدمات کو خراجِ تحسین پیش کیا گیا اور انہیں مختلف برادریوں کے درمیان مضبوط پل قرار دیا گیا۔