امریکا نے ایران کو جنگ بندی کے لیے 15 نکاتی فارمولا بھیج دیا، جوہری پلانٹس بند کرنے کا مطالبہ

امریکا نے مشرقِ وسطیٰ میں جاری کشیدگی اور جنگ کے خاتمے کے لیے ایران کو پندرہ نکاتی امن منصوبہ بھیج دیا ہے۔ امریکی ذرائع ابلاغ کے مطابق اس منصوبے میں واشنگٹن کی جانب سے یہ بنیادی مطالبہ کیا گیا ہے کہ ایرانی سرزمین پر کسی بھی قسم کے مواد کی افزودگی کا عمل فوری طور پر روک دیا جائے۔

مجوزہ معاہدے کے تحت امریکا نے ایران سے پرزور مطالبہ کیا ہے کہ وہ نیطنز، اصفہان اور فردو میں قائم اپنے جوہری پلانٹس کو مکمل طور پر ختم کرے۔ مزید برآں، پندرہ نکاتی ایجنڈے میں یہ شرط بھی رکھی گئی ہے کہ تہران خطے میں اپنے ہمنوا گروہوں کی مالی معاونت بند کرے اور آبنائے ہرمز میں بحری جہازوں کی آزادانہ نقل و حمل کے لیے محفوظ زون قائم کیا جائے۔

دوسری جانب، اسرائیلی میڈیا نے دعویٰ کیا ہے کہ امریکا خطے میں کم از کم ایک ماہ کی عارضی جنگ بندی کا خواہش مند ہے، تاکہ اس دوران ایران کے ساتھ ان پندرہ نکات پر باقاعدہ مذاکرات کا آغاز کیا جا سکے۔