ایرانی فائرنگ کی زدمیں آکر امریکی ایف-35 طیارے کونقصان، ہنگامی لینڈنگ پر مجبور

ایک امریکی ایف-35 لڑاکا طیارے کو ایرانی کی جانب سے فائرنگ کے بعد نقصان پہنچنے کی اطلاع ہے۔ طیارہ ممکنہ طورپر ایرانی فائرنگ  کے بعد مشرقِ وسطیٰ میں قائم امریکی فضائی اڈے پر ہنگامی لینڈنگ کرنے پر مجبور ہو گیا۔

امریکی سینٹرل کمانڈ کے ترجمان کیپٹن ٹم ہاکنز کے مطابق ففتھ جنریشن کا اسٹیلتھ طیارہ ایران میں  ایک جنگی مشن پر تھا جب اسے ہنگامی لینڈنگ کرنا پڑی۔

انہوں نے بتایا کہ طیارہ بحفاظت لینڈ کر گیا ہے جبکہ پائلٹ کی حالت بہتر ہے۔ ترجمان کے مطابق واقعے کی تحقیقات جاری ہیں۔

اس واقعے کی تصدیق کی صورت میں یہ 28 فروری سے شروع ہونے والے جنگ میں پہلی بار ہوگا کہ ایران نے کسی امریکی طیارے کو نشانہ بنایا ہے۔ امریکہ اور اسرائیل دونوں اس تنازع میں ایف-35 طیارے استعمال کر رہے ہیں، اس طیارے کی مالیت 10 کروڑ ڈالر سے زائد ہے۔

یہ پیش رفت ایسے وقت میں سامنے آئی ہے جب امریکی اعلیٰ حکام ایران کے خلاف کارروائیوں میں کامیابی کے دعوے کر رہے ہیں۔ امریکی وزیرِ دفاع پیٹ ہیگستھ کا دعویٰ تھاکہ امریکا فیصلہ کن طور پر کامیابی حاصل کر رہا ہے اور ایران کا فضائی دفاعی نظام بڑی حد تک تباہ ہو چکا ہے۔