وزیراعلیٰ کے پی کا نوجوانوں کے لیے اربوں روپے کے پیکج پر مؤثر عملدرآمد کا حکم

پشاور: وزیراعلیٰ خیبر پختونخوا محمد سہیل آفریدی نے ٹیکنیکل ایجوکیشن اینڈ ووکیشنل ٹریننگ اتھارٹی (ٹیوٹا) کے ایک اہم اجلاس کی صدارت کرتے ہوئے واضح کیا ہے کہ صوبائی حکومت نوجوانوں کی فلاح و بہبود پر اربوں روپے خرچ کر رہی ہے، جس کے نتائج واضح طور پر نظر آنے چاہئیں۔ انہوں نے ‘اسکلز ڈویلپمنٹ’ اور ‘ایمپلائمنٹ پروموشن’ پروگراموں پر سختی سے عملدرآمد یقینی بنانے کی ہدایت جاری کی ہے۔

اجلاس کے دوران بریفنگ میں بتایا گیا کہ ‘رورل اکنامک ٹرانسفارمیشن پراجیکٹ’ کے تحت 42 ہزار نوجوانوں کو اوسطاً 73 ہزار روپے فی کس اسٹارٹ اپ گرانٹ دی جا رہی ہے، جس میں سے اب تک ساڑھے 5 ہزار کے قریب نوجوانوں میں 39.7 کروڑ روپے تقسیم کیے جا چکے ہیں۔ مزید برآں، 3 ارب روپے کے ‘احساس ہنر پروگرام’ کے تحت اب تک 1,211 درخواست گزاروں کو 5 لاکھ روپے تک کے بلا سود قرضے (مجموعی طور پر 58.5 کروڑ روپے) فراہم کیے گئے ہیں۔

وزیراعلیٰ کو بتایا گیا کہ ضم اضلاع کے لیے 685 ملین روپے کی لاگت سے ‘تیز رفتار اسکل ڈویلپمنٹ پروگرام’ پر پیش رفت جاری ہے، جس کے تحت 800 نوجوانوں کی ٹریننگ مکمل ہو چکی ہے اور ان کی این ایل سی (NLC) اور یو ای ٹی (UET) جیسے بڑے اداروں میں پلیسمنٹ یقینی بنائی گئی ہے۔ وزیراعلیٰ نے ٹیوٹا سے فارغ التحصیل نوجوانوں کے لیے 15 ہزار روپے ماہانہ وظیفے کے ساتھ ‘آن جاب ٹریننگ’ کے پروگرام کو سراہتے ہوئے عید کے فوری بعد رورل اکنامک پراجیکٹ پر تفصیلی اجلاس طلب کر لیا ہے۔