کراچی سمیت سندھ بھر میں گرج چمک کے ساتھ مزید بارش اور ژالہ باری کا امکان

کراچی سمیت سندھ کے مختلف علاقوں میں آئندہ 12 سے 24 گھنٹوں کے دوران گرج چمک، تیز ہواؤں اور بارش کی پیشگوئی کی گئی ہے۔

تفصیلات کے مطابق تھرپارکر، ٹھٹھہ، بدین، میرپور خاص، مٹھی، عمرکوٹ، جامشورو اور حیدرآباد کے ساتھ ساتھ کراچی میں بھی وقفے وقفے سے بارش کا امکان ہے، جبکہ کشمور، دادو، جیکب آباد، سکھر، لاڑکانہ، شہید بینظیر آباد اور خیرپور میں بھی موسلا دھار بارش ہوسکتی ہے۔

ماہرین کے مطابق بعض علاقوں میں ژالہ باری کا خدشہ بھی موجود ہے، جس کے باعث گاڑیوں، کمزور ڈھانچوں اور زرعی فصلوں کو نقصان پہنچ سکتا ہے۔

حکام نے شہریوں کو خبردار کیا ہے کہ تیز ہواؤں اور گرج چمک کے دوران غیر ضروری باہر نکلنے سے گریز کریں اور ڈرائیونگ کے دوران خصوصی احتیاط برتیں۔

قومی ڈیزاسٹر مینجمنٹ اتھارٹی نے متعلقہ اداروں کو ہدایت جاری کی ہے کہ وہ مکمل طور پر الرٹ رہیں اور کسی بھی ممکنہ صورتحال سے نمٹنے کے لیے پیشگی اقدامات کریں۔