اسرائیل کاایرانی انٹیلیجنس کے وزیر اسماعیل خطیب کی شہادت کا دعویٰ

اسرائیلی وزیرِ دفاع اسرائیل کاٹز نے تہران میں ایک فضائی حملے میں ایرانی انٹیلیجنس کے وزیر اسماعیل خطیب کی شہادت کا دعویٰ کیاہے۔

اسرائیل کاٹز کا ایک بیان میں کہنا تھا کہ گذشتہ رات ایران کے وزیرِ برائے انٹیلیجنس اسماعیل خطیب کا بھی خاتمہ کر دیا گیا۔ایران نے تاحال اس اسرائیلی دعوے کی تصدیق یا تردید نہیں کی ہے۔

2021 میں ایران کے سابق صدر ابراہیم رئیسی نے اسماعیل خطیب کو وزیر برائے انٹیلیجنس مقرر کیا تھا۔انہوں نے متعدد سینیئر علما سے فقہ کی تعلیم حاصل کی تھی، جن میں آیت اللہ علی خامنہ ای بھی شامل تھے۔

اسماعیل خطیب وزارتِ انٹیلیجنس اور رہبرِ اعلیٰ کے دفتر میں بھی متعدد اعلیٰ عہدوں پر کام کر چکے تھے۔

امریکی محکمہ خزانہ نے 2022 میں ان پر ایران کی وزارتِ انٹیلی جنس کے سربراہ ہونے کی حیثیت سے امریکا اور اس کے اتحادیوں کے خلاف سائبر سرگرمیوں میں ملوث ہونے کے الزام میں پابندیاں عائد کی تھیں۔