سری لنکا کی فٹز ایئر یکم اپریل سے لاہور کے لیے پروازیں شروع کرے گی

کراچی: پاکستان کے ایوی ایشن شعبے کے لیے خوشخبری، سری لنکا کی ایئرلائن فٹز ایئر یکم اپریل سے لاہور کے لیے فضائی آپریشن شروع کرے گی۔

ابتدائی طور پر فٹز ایئر کولمبو سے لاہور کے درمیان ہفتہ وار دو پروازیں چلائے گی۔ پاکستان سول ایوی ایشن اتھارٹی نے ایئرلائن کو فضائی آپریشن کی اجازت دے دی ہے، اور لاہور ایئرپورٹ پر لینڈنگ سلاٹس بھی فراہم کر دیے گئے ہیں۔

فٹز ایئر بدھ اور ہفتے کے دن پروازیں چلائے گی اور اس کے لیے ایئر بس 320 طیارے استعمال کیے جائیں گے۔ نئی ایئرلائن کی آمد سے پاکستان میں نئی ملازمتیں پیدا ہوں گی اور ملکی ایوی ایشن سیکٹر میں سرمایہ کاری اور اعتماد میں اضافہ ہوگا۔

ذرائع کے مطابق یہ اقدام پاکستان کے ایوی ایشن سیکٹر کے لیے مثبت پیش رفت کے طور پر دیکھا جا رہا ہے، خاص طور پر خطے میں موجود جنگی صورتحال کے باوجود غیرملکی ایئرلائنز کے اعتماد میں اضافہ ہوا ہے۔