بلوچستان میں دہشتگردی کا منصوبہ ناکام، خودکش بمبار لڑکی گرفتار

کوئٹہ: کوئٹہ میں سکیورٹی فورسز نے ایک کامیاب انٹیلیجنس بیسڈ آپریشن کے دوران خاتون خودکش بمبار کو گرفتار کر کے بڑی دہشتگردی کی کارروائی ناکام بنا دی۔

سرفراز بگٹی اور صوبائی وزیر داخلہ میر ضیا لانگو نے نیوز کانفرنس میں بتایا کہ یہ کارروائی بلوچستان میں امن و امان کے قیام کے لیے نہایت اہم پیش رفت ہے۔وزیراعلیٰ بلوچستان کا کہنا تھا کہ گرفتار خاتون کا تعلق ضلع خضدار سے ہے، جسے دہشتگرد تنظیموں کی جانب سے خودکش حملے کے لیے تیار کیا گیا تھا۔ ان کے مطابق سکیورٹی فورسز کی بروقت کارروائی سے بڑی تباہی ٹل گئی اور معصوم جانیں محفوظ رہیں۔گرفتار خاتون نے اپنے بیان میں کہا کہ اسے خودکش حملے کے لیے ذہنی طور پر تیار کیا گیا تھا اور مزید لڑکیوں کو بھی اس راستے پر لانے کا ٹاسک دیا گیا تھا، تاہم وہ گرفتاری کے بعد دیگر خواتین کو اس قسم کی سرگرمیوں سے دور رہنے کا پیغام دے رہی ہے۔حکام کے مطابق ابتدائی تحقیقات میں بی ایل اے اور دیگر کالعدم تنظیموں کے درمیان روابط بھی سامنے آئے ہیں، جبکہ دہشتگرد نیٹ ورک کے مزید انکشافات متوقع ہیں۔سرفراز بگٹی نے کہا کہ بلوچستان کے عوام دہشتگردی کو مسترد کر چکے ہیں اور سکیورٹی ادارے ہر وقت ملک دشمن عناصر کے خلاف متحرک ہیں۔ انہوں نے عوام پر زور دیا کہ کسی بھی مشکوک سرگرمی کی اطلاع فوری طور پر متعلقہ اداروں کو دیں۔انہوں نے مزید کہا کہ خواتین اور بچوں کو شدت پسندی سے بچانے کے لیے حکومتی اقدامات جاری ہیں، جبکہ تعلیم، روزگار اور آگاہی مہم کے ذریعے معاشرے کو محفوظ بنانے کی کوشش کی جا رہی ہے۔