فیفا ورلڈکپ، فیفا کا ایران کے میچز امریکہ سے منتقل نہ کرنے اعلان

فیفا نے ایران کے ورلڈ کپ میچز امریکا سے میکسیکو منتقل کرنے کی درخواست مسترد کر دی ہے۔

فیفا ترجمان کے مطابق فیفا ورلڈ کپ 2026 کے تمام میچز طے شدہ شیڈول کے مطابق ہی منعقد ہوں گے اور کسی قسم کی تبدیلی زیر غور نہیں۔ترجمان نے بتایا کہ 6 دسمبر 2025 کو جاری کیے گئے شیڈول کے مطابق ہی ٹیموں کے درمیان مقابلے کروانے کی تیاری جاری ہے اور ایونٹ میں شامل تمام ٹیموں سے مسلسل رابطہ رکھا جا رہا ہے۔فیفا کے اس فیصلے کے بعد ایران کے وزیر کھیل نے ممکنہ بائیکاٹ کا عندیہ دیا ہے، جس سے صورتحال مزید پیچیدہ ہونے کا خدشہ ہے۔اس سے قبل ایران فٹ بال فیڈریشن نے سکیورٹی خدشات کے پیش نظر اپنے میچز امریکا کے بجائے میکسیکو منتقل کرنے کا مطالبہ کیا تھا۔فیڈریشن کے صدر مہدی تاج کا کہنا تھا کہ حالات کے تناظر میں ٹیم کے امریکا جانے پر تحفظات ہیں، لہٰذا میچز کو میکسیکو منتقل کیا جائے۔یاد رہے کہ امریکی صدر ڈونلڈ ٹرمپ نے بھی حالیہ بیان میں ایران ٹیم کے امریکا آنے پر سکیورٹی خدشات کا ذکر کیا تھا۔فیفا کے فیصلے کے بعد اب ایران کے ممکنہ ردعمل اور ورلڈ کپ میں شرکت کے حوالے سے صورتحال پر عالمی نظریں مرکوز ہیں۔