وزیراعظم کی قازقستان کے صدر سے ٹیلی فونک گفتگو؛ کامیاب آئینی ریفرنڈم پر مبارکباد

اسلام آباد: شہباز شریف نے جمہوریہ قازقستان کے صدر قاسم جومارت توکایئف سے ٹیلیفونک گفتگو کے دوران انہیں کامیاب آئینی ریفرنڈم پر مبارکباد دی۔

وزیراعظم نے 15 مارچ 2026 کو قازقستان میں ہونے والے تاریخی ریفرنڈم کو عوامی اعتماد کا مظہر قرار دیتے ہوئے کہا کہ بھرپور ٹرن آؤٹ صدر توکایئف کی قیادت اور اصلاحاتی ایجنڈے پر اعتماد کی عکاسی کرتا ہے۔انہوں نے اس امید کا اظہار کیا کہ یہ اصلاحات قازقستان میں گورننس، ادارہ جاتی استحکام اور قومی ترقی کو مزید مضبوط بنائیں گی۔وزیراعظم نے صدر توکایئف کے حالیہ دورہ پاکستان کا ذکر کرتے ہوئے یقین دہانی کرائی کہ دونوں ممالک کے درمیان طے پانے والے فیصلوں پر ترجیحی بنیادوں پر عملدرآمد جاری ہے، جبکہ مجوزہ معاہدوں اور ایم او یوز کو جلد حتمی شکل دینے کے لیے مزید ملاقاتیں بھی ہوں گی۔صدر توکایئف نے وزیراعظم کو رواں سال کے آخر میں قازقستان کے سرکاری دورے کی دعوت دی، جسے وزیراعظم نے قبول کر لیا۔گفتگو کے دوران دونوں رہنماؤں نے علاقائی صورتحال، بالخصوص افغانستان کی صورتحال پر تبادلہ خیال کیا اور باہمی تعاون، روابط اور مشترکہ خوشحالی کے فروغ پر زور دیا۔وزیراعظم نے آنے والی عیدالفطر کے موقع پر قازقستان کی قیادت اور عوام کو پیشگی مبارکباد دیتے ہوئے ان کے لیے امن، ترقی اور خوشحالی کی نیک خواہشات کا اظہار کیا۔