وفاقی حکومت کا بڑے کاروباری اداروں اور افراد کے خلاف بھرپور کریک ڈاؤن کا فیصلہ

لاہور: وفاقی وزیر داخلہ محسن نقوی اور وزیر خزانہ محمد اورنگزیب کی زیر صدارت خصوصی اجلاس میں منی لانڈرنگ اور ہنڈی مافیا کے خلاف بھرپور کریک ڈاؤن کا فیصلہ کیا گیا۔

اجلاس میں فیصلہ کیا گیا کہ غیر قانونی ذرائع سے بیرون ممالک رقوم بھجوانے والے بڑے کاروباری افراد اور اداروں کے خلاف کوئی رعایت نہیں برتی جائے گی۔ رقوم صرف بینکنگ اور دیگر قانونی چینلز کے ذریعے بھجی جا سکیں گی، اور تمام غیر قانونی چینلز پر ہر سطح پر حوصلہ شکنی کی جائے گی۔

اجلاس میں سٹیٹ بینک اور ایف آئی اے کا جوائنٹ ورکنگ گروپ بھی تشکیل دیا گیا، جو بینکنگ چینلز اور رقوم کی ترسیل کے نظام کی پیش رفت کا باقاعدہ جائزہ لے گا۔ گورنر سٹیٹ بینک اور ڈی جی ایف آئی اے نے اجلاس میں بریفنگ دی، جبکہ وفاقی سیکرٹری خزانہ بھی شریک ہوئے۔