بلوچستان میں امن و استحکام کے قیام کیلئے فیڈرل کانسٹیبلری کی خدمات حاصل کرنے کا فیصلہ

بلوچستان میں امن و استحکام کے قیام کے لیے وفاقی حکومت نے فیڈرل کانسٹیبلری کی خدمات حاصل کرنے کا فیصلہ کیا ہے۔

کوئٹہ میں وفاقی وزیر داخلہ محسن نقوی اور وزیراعلیٰ بلوچستان سرفراز بگٹی کی زیرصدارت اجلاس میں وفاقی و صوبائی اداروں کے اعلیٰ حکام نے شرکت کی۔ اجلاس میں افغان مہاجرین کی واپسی، حوالہ ہنڈی، بھتہ خوری اور اسمگلنگ کے خاتمے سمیت دیگر امور پر بریفنگ دی گئی۔

فیڈرل کانسٹیبلری کے دو ونگز پر مشتمل تقریباً 3,000 اہلکار پہلے مرحلے میں بلوچستان میں تعینات کیے جائیں گے۔ اجلاس میں ایف آئی اے کو مزید فعال بنانے اور خالی آسامیوں پر مقامی افراد کی بھرتی، سوشل میڈیا پر ریاست مخالف سرگرمیوں کی مانیٹرنگ اور پروپیگنڈا کے خلاف کارروائیوں کو تیز کرنے کا فیصلہ بھی کیا گیا۔

وزیر داخلہ نے بلوچستان پولیس کی پیشہ ورانہ استعداد بڑھانے کے لیے تعاون کی یقین دہانی کرائی، جبکہ وزیراعلیٰ سرفراز بگٹی نے کہا کہ دہشت گردی کے خلاف جنگ پورے ملک کی مشترکہ ذمہ داری ہے اور ریاست کی عملداری ہر صورت یقینی بنائی جائے گی۔