ایران جنگ: برطانیہ میں ایک لاکھ سے زائد افراد بے روزگار ہونے کا خدشہ

لندن: ایران میں جاری کشیدگی اور ممکنہ جنگ کے باعث برطانیہ کی معیشت پر گہرے اثرات مرتب ہونے کا خدشہ ہے، جس کے نتیجے میں ایک لاکھ سے زائد افراد بے روزگار ہو سکتے ہیں۔

میڈیا رپورٹ کے مطابق رواں برس دو مرتبہ شرح سود میں کمی کی توقعات کمزور ہو گئی ہیں۔ ماہر اقتصادیات کیمز اسمتھ کا کہنا ہے کہ اگر جنگ تین ماہ تک جاری رہی تو توانائی کے بڑھتے ہوئے اخراجات کے پیش نظر ادارے ورکرز کو چھٹیوں پر بھیج سکتے ہیں اور نئی بھرتیاں روک سکتے ہیں۔

رپورٹ میں بتایا گیا ہے کہ برطانیہ میں موجودہ بے روزگاری کی شرح پہلے ہی پانچ سال کی بلند ترین سطح 5.2 فیصد پر ہے، جبکہ تین ماہ طویل جنگ کی صورت میں یہ شرح 5.5 فیصد تک پہنچ سکتی ہے۔ ماہرین کا کہنا ہے کہ شرح سود میں کمی کے امکانات معیشت کو سہارا دینے میں ناکام رہے۔