ایران حملے بند کردے توسفارتکاری سے کوئی راستہ نکال لیں گے، قطر

قطری وزارتِ خارجہ کے ترجمان ماجد الانصاری کا کہنا ہے کہ اگر ایران حملے روک دیتاہے تو ہم سفارت کاری کے ذریعے کوئی راستہ نکال سکتے ہیں۔ لیکن ہمارے ممالک پر حملے ہوتے رہیں گےتومجوزہ کمیٹیاں کا قیام ممکن نہیں۔
ماجد الانصاری جس کمیٹی کا حوالہ دے رہے ہیں اس کی تجویز ایران کے وزیر خارجہ عباس عراقچی نے دی تھی تاکہ خلیجی ریاستوں میں شہری انفراسٹرکچر پر ہونے والے حملوں کی تحقیقات کی جا سکے۔ ایران ان حملوں میں ملوث ہونے کی تردید کرتا آیا ہے۔ جبکہ قطرنے اس موقف کو مستردکردیاہے۔
قطری ترجمان کا کہنا ہے کہ جنگ کے آغاز سے اب تک شہری اہداف پر حملے اور ان کے خلاف دھمکیوں کا سلسلہ رکا نہیں ہے۔ انھوں نےہفتے کے روز داغے گئے ایک میزائل کا حوالہ دیتے ہوئے کہا کہ اس کا نشانہ دوحہ کا ایک رہائشی علاقہ تھا۔
ان کا کہنا ہے کہ اس وقت انخلا کے احکامات جاری کرنے کا فیصلہ جزوی طور پر ایرانی میڈیا میں چلنے والی ان خبروں کے بعد کیا گیا تھا جن میں کہا گیا تھا کہ رہائشی اور تجارتی علاقوں میں واقع مخصوص کمپنیوں کو نشانہ بنایا جائے گا۔
ان علاقوں میں گوگل، امریکن ایکسپریس اور مائیکروسافٹ جیسی امریکی کمپنیوں کے دفاتر واقع تھے۔قطری ترجمان نے واضح کیا کہ قطر بحران کو کم کرنے کی کوشش کر رہا ہے لیکن وہ اس وقت امریکا اور ایران کے درمیان کسی باضابطہ ثالثی سے آگاہ نہیں۔