بلوچستان حکومت کا تعلیمی پسماندگی کے خاتمے کیلئے انقلابی اقدامات کا فیصلہ

وزیر اعلیٰ بلوچستان سردار سرفراز بگٹی کی زیر صدارت بجٹ اجلاس میں صوبے سے تعلیمی پسماندگی ختم کرنے کے لیے انقلابی اقدامات کی منظوری دی گئی ہے۔ آئندہ مالی سال کے بجٹ میں 679 پرائمری اور 409 مڈل اسکولوں کو اپ گریڈ کرنے کا فیصلہ کیا گیا ہے، جس سے حکام کے مطابق گزشتہ 15 سال کا تعلیمی عدم توازن ختم ہو جائے گا۔ اجلاس میں آؤٹ آف اسکول بچوں کو تعلیمی اداروں میں واپس لانے کے لیے 5 سالہ پروگرام اور طالبات کے لیے ماہانہ وظیفہ دینے کی تجاویز پر بھی غور کیا گیا۔

وزیر اعلیٰ سرفراز بگٹی کا کہنا تھا کہ تعلیم میں سرمایہ کاری بلوچستان کے روشن مستقبل کی ضمانت ہے اور ہر بچے کو اسکول پہنچانا حکومت کی ذمہ داری ہے۔ اجلاس میں محکمہ پلاننگ اینڈ ڈویلپمنٹ نے 174 ارب روپے کی لاگت سے 308 نئی اسکیموں پر بریفنگ دی، جبکہ وزیر اعلیٰ نے واضح کیا کہ آئندہ بجٹ میں تعلیم، صحت اور بنیادی سہولیات کی فراہمی اولین ترجیح ہوگی تاکہ دور دراز علاقوں کے نوجوانوں کو بھی ترقی کے یکساں مواقع میسر آسکیں۔