پنجاب ایمرجنسی سروس کے ملازمین سول نہیں، پبلک سرونٹس ہیں: سپریم کورٹ

سپریم کورٹ نے پنجاب ایمرجنسی سروس  ریسکیو 1122 کے ملازمین کے بارے میں اہم فیصلہ سناتے ہوئے واضح کیا ہے کہ ریسکیو 1122 کے ملازمین سول سرونٹس کی تعریف میں نہیں آتے۔

سپریم کورٹ کی جسٹس عائشہ ملک نے تحریری فیصلہ جاری کیا جس میں سپریم کورٹ نے پنجاب سروس ٹربیونل کا حکم کالعدم قرار دیتے ہوئے حکومت کی اپیلیں منظور کر لیں۔فیصلے کے مطابق پنجاب ایمرجنسی سروس کے ملازمین کی حیثیت پبلک سرونٹس کی ہے، تاہم ان کے سروس معاملات میں پنجاب سروس ٹربیونل کا کوئی دائرہ اختیار نہیں۔ محض اس بات سے کہ ادارہ سرکاری محکمہ ہے، ملازمین خود بخود سول سرونٹ نہیں بن جاتے۔سپریم کورٹ نے مزید کہا کہ ریسکیو 1122 کے ملازمین علیحدہ قانونی فریم ورک اور رولز 2007 کے تحت ریگولیٹ ہوتے ہیں، اور 2021 کی ترمیم کے بعد بھی پنجاب ایمرجنسی سروس ایک آزاد قانونی محکمہ کے طور پر کام کر رہی ہے۔

یاد رہے کہ ریسکیو ڈرائیور محمد خلیل نے اپنے خلاف ہونے والی محکمانہ تادیبی کارروائیوں کو پنجاب سروس ٹربیونل میں چیلنج کیا تھا، جس پر سروس ٹربیونل نے معاملے کی نئی انکوائری کا حکم دیا تھا۔ حکومت پنجاب کا موقف تھا کہ ریسکیو 1122 کے ملازمین مخصوص قانونی ڈھانچے کے تحت پبلک سرونٹس ہیں۔