وزیراعظم شہباز شریف کی خلیجی ممالک کو اشیائے خورونوش کی فراہمی یقینی بنانے کی ہدایت

وزیراعظم شہباز شریف نے خلیجی ممالک کو درکار اشیائے خورونوش کی فراہمی یقینی بنانے اور ان کے غذائی تحفظ کا خیال رکھنے کی ہدایت کر دی۔
وزیراعظم کی زیر صدارت لاہور میں اجلاس ہوا جس میں خطے کی بدلتی صورتحال کے پیش نظر ملک میں غذائی صورتحال اور وافر اشیائے خورونوش کی برآمدات کا جائزہ لیا گیا۔
اجلاس کو ملک میں موجود اشیائے خورونوش کے ذخائر اور پیداوار کے حوالے سے بریفنگ دی گئی۔ بریفنگ میں بتایا گیا کہ پاکستان میں اشیائے خورونوش کا وافر ذخیرہ موجود ہے اور کسی چیز کی قلت نہیں۔
بریفنگ کے مطابق پاکستان میں زرعی اجناس، گوشت، پولٹری، ڈیری مصنوعات اور سمندری خوراک کی برآمد کی وسیع استعداد موجود ہے۔
وزیراعظم نے ہدایت کی کہ ملکی غذائی ضروریات کے لیے اشیائے خورونوش کی طلب اور رسد کی مکمل نگرانی کی جائے۔
انہوں نے کہا کہ عالمی سپلائی چینز متاثر ہونے کے باعث خطے میں پاکستانی مصنوعات کی برآمد کی استعداد میں اضافہ ہوا ہے، اس لیے خلیجی ممالک کو درکار اشیائے خورونوش کی فراہمی اور ان کے غذائی تحفظ کا خیال رکھا جائے۔
وزیراعظم نے ہدایت کی کہ وافر اشیائے خورونوش کی خلیجی ممالک کو برآمد کے لیے جامع لائحہ عمل تشکیل دیا جائے اور برادر خلیجی ممالک کو برآمدات کے دوران اعلیٰ معیار کو یقینی بنایا جائے۔
اجلاس میں وزیراعظم نے پاکستان نیشنل شپنگ کارپوریشن کو بھی خلیجی ممالک میں اشیائے خورونوش کی برآمد کے لیے ضروری اقدامات کرنے کی ہدایت کی۔
وزیراعظم نے صورتحال کا روزانہ جائزہ لینے کے لیے ایک کمیٹی قائم کرنے کی بھی ہدایت کی جبکہ خلیجی ممالک میں تعینات پاکستانی سفیروں اور تجارتی افسران کو متحرک رہنے کی ہدایت بھی کی