امریکا کا ایران کے سکول پر حملہ جنگی قوانین کی خلاف ورزی ہے: ڈائریکٹر ہیومن رائٹس واچ

ہیومن رائٹس واچ واشنگٹن کی ڈائریکٹر سارہ یاگر نے ایران کے شہر مناب میں لڑکیوں کے ایک سکول پر امریکی میزائل حملے کو جنگی قوانین کی سنگین خلاف ورزی قرار دے دیا ہے۔ انہوں نے اپنے بیان میں واضح کیا کہ امریکی فوج کی اپنی تحقیقات کے نتائج بھی اس بات کی تصدیق کرتے ہیں کہ حملے کے دوران بین الاقوامی ضابطوں کو پامال کیا گیا۔

سارہ یاگر نے امریکی موقف پر تنقید کرتے ہوئے کہا کہ اگر یہ حملہ “غلطی” بھی تھا، تب بھی اسے نظر انداز نہیں کیا جا سکتا کیونکہ بچوں سے بھرے سکول کو نشانہ بنانا کسی بھی صورت میں جائز نہیں ہے۔ انہوں نے زور دیا کہ امریکی فوج کی یہ بنیادی ذمہ داری تھی کہ وہ شہریوں کو تحفظ فراہم کرنے کے لیے تمام احتیاطی تدابیر اختیار کرتی، جو کہ اس واقعے میں مکمل طور پر مفقود نظر آئیں۔ ڈائریکٹر ہیومن رائٹس واچ نے مطالبہ کیا کہ امریکی فوج میں فوری طور پر اصلاحات کی جائیں اور اس مجرمانہ غفلت کے ذمہ داروں کا تعین کر کے ان کی جوابدہی کو یقینی بنایا جائے تاکہ مستقبل میں معصوم شہریوں اور تعلیمی اداروں کو ایسی تباہی سے بچایا جا سکے۔