نہال ہاشمی نے گورنر سندھ کے عہدے کا حلف اٹھا لیا

پاکستان مسلم لیگ (ن) کے سینئر رہنما نہال ہاشمی نے باقاعدہ طور پر گورنر سندھ کے عہدے کا حلف اٹھا لیا ہے۔ گورنر ہاؤس کراچی میں منعقدہ پروقار تقریب کے دوران چیف جسٹس سندھ ہائیکورٹ نے ان سے عہدے کا حلف لیا۔ اس موقع پر وزیراعلیٰ سندھ مراد علی شاہ نے نہال ہاشمی کو نئی ذمہ داریاں سنبھالنے پر مبارکباد پیش کی اور نیک تمناؤں کا اظہار کیا۔

حلف برداری کی تقریب میں میئر کراچی بیرسٹر مرتضیٰ وہاب، صوبائی وزیر داخلہ ضیاء الحسن لنجار، سعید غنی، سینیٹر وقار مہدی اور ایڈیشنل آئی جی کراچی آزاد خان سمیت اہم سیاسی و سماجی شخصیات نے شرکت کی۔ تقریب میں وفاقی ترجمان راجہ انصاری، علی اکبر گجر اور مسلم لیگ (ن) کے دیگر سرکردہ رہنما بھی موجود تھے۔ سیاسی حلقوں کی جانب سے نہال ہاشمی کی تعیناتی کو صوبے اور وفاق کے درمیان بہتر ہم آہنگی کے لیے اہم قرار دیا جا رہا ہے۔