وزیر اعلیٰ کے پی کا بانی پی ٹی آئی کا ‘الشفاء’ میں علاج کرانے کا مطالبہ

وزیر اعلیٰ خیبر پختونخوا سہیل آفریدی نے پی ٹی آئی کے دیگر رہنماؤں کے ہمراہ پریس کانفرنس کرتے ہوئے بانی تحریک انصاف کی صحت اور علاج کے حوالے سے شدید تشویش کا اظہار کیا ہے۔ انہوں نے کہا کہ آج کی پریس کانفرنس کا ون پوائنٹ ایجنڈا بانی پی ٹی آئی کی صحت ہے اور ہمارا مطالبہ ہے کہ ان کا علاج ان کی فیملی کی موجودگی میں الشفاء ہسپتال میں کروایا جائے۔ وزیر اعلیٰ کا کہنا تھا کہ بارہا مطالبات کے باوجود حکومت اس معاملے پر توجہ نہیں دے رہی، جو کہ انسانی حقوق کی سنگین خلاف ورزی ہے۔

وفاقی حکومت پر تنقید کرتے ہوئے وزیر اعلیٰ سہیل آفریدی نے کہا کہ ملک میں ایسی حکومت نافذ ہے جس کے پاس نہ داخلہ پالیسی ہے اور نہ ہی کوئی خارجہ پالیسی، ان کی تمام تر توجہ صرف بانی پی ٹی آئی کے علاج میں رکاوٹیں ڈالنے اور تحریک انصاف کے رہنماؤں کو نااہل کروانے پر مرکوز ہے۔ انہوں نے سوال اٹھایا کہ ایسے مفادات کے ساتھ ملک کیسے ترقی کر سکتا ہے؟ انہوں نے واضح کیا کہ بانی پی ٹی آئی پارٹی کے تاحیات لیڈر ہیں اور ان کی صحت پر کوئی سمجھوتہ نہیں کیا جائے گا