لکی مروت میں دھماکا، ایس ایچ او سمیت 6 پولیس اہلکار شہید

خیبرپختونخوا کے ضلع لکی مروت میں دہشت گردی کے ایک افسوسناک واقعے میں ایس ایچ او سمیت 6 پولیس اہلکار شہید ہو گئے ہیں۔ پولیس حکام کے مطابق یہ واقعہ اس وقت پیش آیا جب معمول کی پیٹرولنگ کے دوران پولیس کی گاڑی کو بارودی مواد سے نشانہ بنایا گیا۔ دھماکا اس قدر شدید تھا کہ گاڑی مکمل طور پر تباہ ہو گئی، جس کے نتیجے میں ایس ایچ او صدر اعظم، کانسٹیبل شاہ بہرام، شاہ خالد، حاجی محمد، گل زادہ اور سخی زادہ نے جامِ شہادت نوش کیا، جبکہ کانسٹیبل انصاف الدین زخمی ہو گئے جنہیں طبی امداد کے لیے اسپتال منتقل کر دیا گیا ہے۔

دوسری جانب، لکی مروت ہی کے علاقے تختی خیل میں سیکیورٹی فورسز نے دہشت گردوں کی موجودگی کی اطلاع پر ایک کامیاب مشترکہ آپریشن کیا ہے۔ پولیس ترجمان کے مطابق پولیس، سی ٹی ڈی اور مقامی امن کمیٹی کی اس کارروائی کے دوران شدید فائرنگ کے تبادلے میں 5 خوارج ہلاک جبکہ متعدد زخمی ہو گئے۔ علاقے میں دیگر دہشت گردوں کی ممکنہ موجودگی کے پیش نظر سرچ آپریشن تاحال جاری ہے۔