پاک بحریہ کا بحیرۂ عرب میں بڑا آپریشن، 130 ملین ڈالر مالیت کی 2 ہزار کلو آئس برآمد

کراچی: پاک بحریہ نے بحیرۂ عرب میں انسدادِ منشیات کی ایک بڑی کارروائی کے دوران 130 ملین ڈالرز مالیت کی آئس ضبط کرتے ہوئے اہم کامیابی حاصل کر لی۔ پی این ایس تبوک نے یہ کارروائی ریجنل میری ٹائم سیکیورٹی پیٹرول کے دوران، سعودی عرب کی قیادت میں کام کرنے والی کمبائنڈ میری ٹائم فورسز کی ٹاسک فورس 150 کے تعاون سے انجام دی۔

آپریشن کے دوران ایک مشکوک ماہی گیر کشتی کی تلاشی لی گئی، جس سے 2 ہزار کلوگرام سے زائد آئس برآمد ہوئی۔ ترجمان کے مطابق یہ گزشتہ دو ماہ میں پاک بحریہ کا تیسرا مسلسل کامیاب انسدادِ منشیات آپریشن ہے، جو سمندروں میں غیر قانونی سرگرمیوں کے خلاف بحریہ کی موثر کارروائیوں کا ثبوت ہے۔

اعلامیے میں مزید کہا گیا ہے کہ پاک بحریہ سمندر میں ہر طرح کی غیر قانونی نقل و حمل کی روک تھام کے لیے ہمیشہ تیار ہے۔ قومی بحری مفادات کے تحفظ اور خطے میں میری ٹائم سیکیورٹی کے فروغ میں پاک بحریہ فعال کردار ادا کرتی رہے گی۔