ایران جنگ خاتمے کے قریب، نئی ایرانی قیادت کو بھی مار دیں گے: امریکی صدر

امریکی صدر ڈونلڈ ٹرمپ نے کہا ہے کہ ایران کے خلاف جاری جنگ اپنے اختتام کے قریب ہے اور امریکا نے ایران کی طاقت کو وقت سے پہلے ہی کمزور کر دیا ہے۔

فلوریڈا میں ایک کنونشن سے خطاب کرتے ہوئے ڈونلڈ ٹرمپ کا کہنا تھا کہ امریکا اب تک ایران کے 5 ہزار سے زائد اہداف کو نشانہ بنا چکا ہے۔ ان کے مطابق دیکھا جائے تو امریکا جنگ جیت چکا ہے، تاہم ایران نے ابھی تک اپنی شکست تسلیم نہیں کی۔انہوں نے کہا کہ امریکا دشمن کے خطرے کو ہمیشہ کے لیے ختم کرنے کے لیے کارروائیاں جاری رکھے گا اور ایران کی نئی قیادت کو بھی نشانہ بنایا جا سکتا ہے۔ صدر ٹرمپ کے مطابق زمینی فوج بھیجنے کا ابھی فیصلہ نہیں کیا گیا۔امریکی صدر نے دعویٰ کیا کہ ایران کے ڈرون حملوں میں 83 فیصد کمی آ چکی ہے اور امریکا ایران کی ڈرون سازی کی صلاحیت کو بھی نشانہ بنا رہا ہے۔ ان کے مطابق اگر امریکا حملہ نہ کرتا تو ایران ایک ہفتے کے اندر امریکا یا اس کے اتحادیوں پر حملہ کر دیتا۔ڈونلڈ ٹرمپ نے کہا کہ امریکا نے ایرانی ڈرونز اور بحری جہازوں کو تباہ کر دیا ہے جبکہ ایران کی ڈرون بنانے کی صلاحیت کو بھی ختم کرنے کی کوشش کی جا رہی ہے۔انہوں نے خبردار کیا کہ اگر ایران نے آبنائے ہرمز کو بند کرنے کی کوشش کی تو اسے سخت ردعمل کا سامنا کرنا پڑے گا۔امریکی صدر کا کہنا تھا کہ امریکا کسی کی دھمکی سے نہیں ڈرتا اور ایران خطے میں دہشت گردی کی پشت پناہی کرنے والا بڑا ملک ہے، جس کی مثال حماس اور حزب اللہ ہیں۔