پیشگی منصوبہ بندی نہ ہوتی تو پیٹرول 375 روپے فی لیٹر ہو چکا ہوتا :خواجہ آصف

وزیر دفاع خواجہ محمد آصف نے کہا ہے کہ اگر پیشگی منصوبہ بندی نہ کی جاتی تو آج پیٹرول کی قیمت 375 روپے فی لیٹر تک پہنچ چکی ہوتی۔

سماجی رابطے کی ویب سائٹ پر جاری بیان میں خواجہ آصف نے کہا کہ مشرقِ وسطیٰ اور ایران میں کشیدہ صورتحال نے عالمی معیشت پر گہرا اثر ڈالا ہے۔

انہوں نے بتایا کہ آبنائے ہرمز کی بندش کے باعث چند دنوں میں پیٹرولیم مصنوعات کی قیمتیں آسمان کو چھو رہی ہیں۔ ایسے بحران میں حکومت کی جانب سے پیٹرول اور ڈیزل کی قیمتوں میں محدود اضافہ کرنا ایک محنت طلب کام ہے۔

وزیر دفاع نے مزید کہا کہ اس میں پیشگی منصوبہ بندی، مربوط روابط اور انتظامات کی طویل داستان شامل ہے۔ اگر یہ سب اقدامات نہ کیے جاتے تو آج پیٹرول کی قیمت 375 روپے فی لیٹر ہو چکی ہوتی۔