وزیراعظم سے جماعت اسلامی کے وفد کی ملاقات، مشرق وسطی پر اعتماد میں لیا

وزیراعظم محمد شہباز شریف سے جماعت اسلامی کے اعلیٰ سطح کے وفد نے امیر جماعت اسلامی پاکستان حافظ نعیم الرحمان کی قیادت میں اہم ملاقات کی۔ وزیراعظم ہاؤس میں ہونے والی اس ملاقات میں لیاقت بلوچ، میاں محمد اسلم اور آصف لقمان قاضی بھی وفد کا حصہ تھے۔

ملاقات کے دوران وفد کو خطے کی بدلتی ہوئی صورتحال، بالخصوص افغانستان، ایران، مشرقِ وسطیٰ اور خلیجی ممالک کے موجودہ بحران پر “ان کیمرہ” بریفنگ دی گئی۔ وزیراعظم نے جماعت اسلامی کی قیادت کو پاکستان کی جانب سے کی جانے والی سفارتی کوششوں اور علاقائی استحکام کے لیے اٹھائے گئے اقدامات پر اعتماد میں لیا۔

وفد کو خصوصی طور پر ایران اور خلیجی ریاستوں میں مقیم پاکستانیوں کے تحفظ اور ان کی سہولت کے لیے پاکستانی سفارتخانوں کی جانب سے کیے گئے ہنگامی اقدامات سے بھی آگاہ کیا گیا۔ حکومت نے واضح کیا کہ کشیدگی کے اس ماحول میں تارکینِ وطن کی حفاظت ریاست کی اولین ترجیح ہے۔

اس اہم مشاورتی بیٹھک میں نائب وزیراعظم و وزیر خارجہ سینیٹر اسحاق ڈار سمیت وفاقی وزراء اعظم نذیر تارڑ، احسن اقبال، عطاء اللہ تارڑ، رانا مبشر اقبال، مشیر وزیراعظم رانا ثناء اللہ اور وزیرِ مملکت طلال چودھری بھی شریک تھے۔ سیاسی تجزیہ کار اس ملاقات کو قومی یکجہتی اور خارجہ پالیسی پر سیاسی اتفاقِ رائے پیدا کرنے کی ایک اہم کوشش قرار دے رہے ہیں۔