ایران پر حملے کا مقصد اسرائیلی اثر و رسوخ پاکستانی سرحد تک لانا ہے: خواجہ آصف

وفاقی وزیر دفاع خواجہ محمد آصف نے خبردار کیا ہے کہ ایران کے خلاف جاری جنگ کا اصل مقصد اسرائیل کے اثر و رسوخ کو پاکستان کی سرحدوں تک پھیلانا ہے۔ سماجی رابطے کی ویب سائٹ ‘ایکس’ پر اپنے پیغام میں انہوں نے کہا کہ صیہونیت انسانیت کے لیے خطرہ ہے اور اسلامی دنیا پر مسلط تمام جنگوں کے پیچھے صیہونی ریاست کا ہاتھ ہے۔ انہوں نے واضح کیا کہ ایران کی معاہدے پر رضا مندی کے باوجود اس پر جنگ مسلط کی گئی تاکہ پاکستان کو ہر طرف سے دشمنوں میں گھیر کر ایک دست نگر ریاست بنایا جا سکے۔ خواجہ آصف نے عوام پر زور دیا کہ وہ سیاسی اختلافات کے باوجود اس ازلی دشمن کے عزائم کو سمجھیں۔