آبنائے ہرمز بند، خلیج فارس میں جہاز پھنس گئے، عالمی تجارت کو دھچکا

ایران کی جانب سے آبنائے ہرمز کی بندش کے بعد عالمی بحری تجارت شدید بحران سے دوچار ہو گئی ہے۔ یونانی جہاز رانی مرکز کے ذرائع کے مطابق صورتحال غیر یقینی اور تشویشناک ہے۔

ذرائع نے بتایا کہ یورپ سے ایشیا آنے والے تجارتی جہازوں کو نہر سوئز میں داخل ہونے سے روک دیا گیا ہے، جبکہ متعدد جہاز بحیرہ روم میں لنگر انداز ہو کر صورتحال واضح ہونے کے منتظر ہیں۔

سعودی عرب کی دمام بندرگاہ میں موجود جہازوں کو بھی فوری طور پر بندرگاہ چھوڑنے کی ہدایت جاری کی گئی ہے۔

ذرائع کے مطابق خلیج فارس میں ایک وقت میں ڈیڑھ سو تک تیل بردار اور کارگو جہاز موجود ہوتے ہیں۔ موجودہ حالات میں کئی جہازوں نے اپنی شناختی نظام اور روشنیاں بند کر دی ہیں، جس سے خطرات میں مزید اضافہ ہو گیا ہے۔

ماہرین کا کہنا ہے کہ خلیج فارس اور بحیرہ روم میں رکے جہازوں اور ان کے عملے کو شدید خطرات لاحق ہیں جبکہ مالی نقصان بھی بھاری ہوگا۔ درمیانے اور بڑے جسامت کے جہازوں کا یومیہ جرمانہ بیس ہزار سے ایک لاکھ ڈالر تک پہنچ سکتا ہے۔

ذرائع نے مزید بتایا کہ ایل پی جی کی عالمی قیمت میں نمایاں اضافہ متوقع ہے اور یہ 700 سے 750 ڈالر فی ٹن تک جا سکتی ہے، جبکہ خام تیل کی قیمتوں پر اثرات چند روز میں واضح ہوں گے۔