ایران کی صورتحال پر ہنگامی ہدایات، وزیراعظم کا سیکیورٹی اداروں کو مکمل الرٹ رہنے کا حکم

وزیراعظم محمد شہباز شریف کی زیر صدارت ملک کی مجموعی سیکیورٹی صورتحال پر اہم اجلاس منعقد ہوا جس میں قومی سلامتی سے متعلق امور کا تفصیلی جائزہ لیا گیا۔

وزیراعظم نے ہدایت کی کہ وفاقی اور صوبائی سطح پر تمام متعلقہ ادارے موجودہ حالات کے پیش نظر فوری اور جامع حفاظتی انتظامات یقینی بنائیں۔ انہوں نے واضح کیا کہ قومی سلامتی کے معاملے پر کسی قسم کی غفلت برداشت نہیں کی جائے گی اور تمام ادارے مکمل ہم آہنگی کے ساتھ فرائض انجام دیں۔

اجلاس کو آگاہ کیا گیا کہ سیکیورٹی ادارے مکمل طور پر الرٹ ہیں اور ملک کے دفاع کے لیے تمام ضروری اقدامات کیے جا رہے ہیں۔

ایران کی صورتحال کے پیش نظر وزیراعظم نے وزارت خارجہ کو ہدایت جاری کی کہ ایران میں مقیم پاکستانیوں کو بحفاظت وطن واپس لانے کے لیے فوری عملی اقدامات کیے جائیں۔ انہوں نے کہا کہ شہریوں کو آذربائیجان کے ذریعے پاکستان منتقل کیا جائے اور اس مقصد کے لیے متعلقہ حکام سے فوری رابطہ کیا جائے۔

وزیراعظم نے کہا کہ پاکستانی قوم اور مسلح افواج ملکی سلامتی اور علاقائی سالمیت کے تحفظ کے لیے متحد ہیں۔ انہوں نے کہا کہ سید عاصم منیر کی قیادت میں افواج پاکستان اپنی پیشہ ورانہ ذمہ داریاں بھرپور انداز میں ادا کر رہی ہیں اور دہشت گردی کے خلاف جاری جنگ میں فورسز کی قربانیاں ناقابل فراموش ہیں۔

اجلاس میں اہم وفاقی وزرا، صوبائی چیف سیکرٹریز، انسپکٹر جنرل پولیس اور متعلقہ اعلیٰ حکام نے شرکت کی۔