14امریکی فوجی اڈوں کوہدف بنایا، سیکڑوں امریکی فوجی ہلاک ہوئے، پاسداران انقلاب کا دعویٰ

اسرائیل اور امریکا کے حملوں کے جواب میں خطے میں موجود  14امریکی فوجی اڈوں کو ٹارگٹ کیاگیاہے جس میں سیکڑوں امریکی فوجی ہلاک ہوگئے، ایرانی پاسداران انقلاب کا بڑا دعویٰ سامنے آگیا۔

ترجمان ایرانی پاسداران انقلاب کے مطابق ایران کی افواج کا طاقتور آپریشن بھرپور قوت سے جاری رہے گا۔ امریکی اڈوں پر ایرانی فورسز کے حملےمزید شدت کے ساتھ ہوں گے۔اس سے قبل  ایرانی پاسدران انقلاب نے اعلان کیا تھا کہ اس نے خطے میں موجود کئی امریکی فوجی اڈوں کو نشانہ بنایا ہے، جن میں بحرین میں تعینات امریکی بحریہ کا ففتھ فلیٹ بھی شامل ہے۔

ایرانی سرکاری میڈیا کے مطابق ایرانی پاسدران انقلاب کا کہنا ہےکہ اس نے بحرین، قطر اور متحدہ عرب امارات میں موجود امریکی اڈوں کے ساتھ ساتھ مقبوضہ فلسطینی علاقوں کے مرکز میں واقع فوجی اڈوں کونشانہ بنایا ہے۔

ایرانی پاسدران انقلاب کا کہنا ہےکہ آپریشن وعدہ صادق 4′ امریکی فوج اور بچوں کے قاتل صہیونی حکومت کے خلاف کیا جارہا ہے، جس کے تحت جارح دشمن کے علاقائی اہداف پر حملے کیے گئے ہیں۔