ایران نے روس کو یوکرین کے خلاف جنگ میں ڈرون فراہم کیے، امریکا

اقوام متحدہ کی سلامتی کونسل کے خصوصی اجلاس میں، جو روس یوکرین جنگ کے 4 سال مکمل ہونے پر طلب کیا گیا تھا، امریکی سفیر نے ایران پر سنگین الزامات عائد کرتے ہوئے کہا ہے کہ تہران نے یوکرین کے خلاف جنگ میں روس کو ڈرونز فراہم کیے۔ اپنے خطاب کے دوران امریکی سفیر نے واضح کیا کہ صدر ٹرمپ یوکرین اور روس کے درمیان جاری اس طویل جنگ کے خاتمے کے لیے بھرپور طریقے سے سرگرم ہیں۔

امریکی سفیر نے چین کو بھی آڑے ہاتھوں لیتے ہوئے کہا کہ اگر بیجنگ واقعی خطے میں امن کا خواہاں ہے تو اسے روس کو فوجی سازوسامان کی فراہمی اور اس سے تیل کی خریداری فوری طور پر بند کرنی ہوگی۔ انہوں نے خبردار کیا کہ یوکرین کی جنگ اب محض علاقائی تنازع نہیں رہی بلکہ عالمی امن اور سلامتی کے لیے ایک بڑا خطرہ بن چکی ہے۔ انہوں نے دونوں فریقین پر زور دیا کہ وہ مذاکرات کی میز پر بیٹھیں تاکہ اس دیرینہ تنازع کا سفارتی حل نکالا جا سکے۔