فلوریڈا میں ٹرمپ کی رہائشگاہ پر داخلے کی کوشش، مشتبہ شخص سیکرٹ سروس کی فائرنگ سے ہلاک

امریکی ریاست فلوریڈا میں صدر ڈونلڈ ٹرمپ کی رہائشگاہ مار اے لاگو میں داخل ہونے کی کوشش کرنے والا مسلح شخص سیکرٹ سروس کی جوابی فائرنگ میں ہلاک ہو گیا۔

سیکرٹ سروس حکام کے مطابق مشتبہ شخص شاٹ گن اور ایندھن کا کنستر اٹھائے ہوئے تھا اور رہائشگاہ کی حدود میں داخل ہونے کی کوشش کر رہا تھا۔

پام بیچ کاؤنٹی کے شیرف رک بریڈشا نے میڈیا کو بتایا کہ اہلکاروں نے مشتبہ شخص کو ہتھیار نیچے رکھنے کا حکم دیا، تاہم اس نے شاٹ گن کو فائرنگ کی پوزیشن میں اٹھا لیا، جس پر قانون نافذ کرنے والے اہلکاروں نے فوری کارروائی کرتے ہوئے فائرنگ کی۔

واقعے میں کوئی اہلکار زخمی نہیں ہوا جبکہ مشتبہ شخص موقع پر ہی دم توڑ گیا۔

حکام کے مطابق صدر ٹرمپ اس وقت واشنگٹن میں تھے اور واقعے کے دوران رہائشگاہ پر موجود نہیں تھے۔

تحقیقات کے لیے وفاقی تحقیقاتی ادارے نے معاملے کی ذمہ داری سنبھال لی ہے اور واقعے کے محرکات جاننے کے لیے شواہد اکٹھے کیے جا رہے ہیں۔