پی ایس ایل: سیالکوٹ اسٹالیئنز کے 98 فیصد حصص سی ڈی وینچرز کے نام، او زی گروپ کی دستبرداری

پاکستان سپر لیگ کے آغاز سے قبل فرنچائز سیالکوٹ اسٹالیئنز کی ملکیت میں ایک بار پھر بڑی تبدیلی سامنے آئی ہے۔ ذرائع کے مطابق OZ Group نے ٹیم کے 98 فیصد حصص CD Ventures کو فروخت کر دیے ہیں۔

ذرائع کا کہنا ہے کہ سی ڈی وینچرز کے نمائندے گوہر شاہ نے او زی گروپ سے 98 فیصد حصص خرید لیے۔ اس طرح ٹورنامنٹ کے انعقاد سے قبل ٹیم کی ملکیت ایک مرتبہ پھر تبدیل ہو گئی ہے۔

یاد رہے کہ آٹھ جنوری کو یہ ٹیم 185 کروڑ روپے میں فروخت ہوئی تھی تاہم بولی میں شامل ایک حصے دار نے بیس جنوری کو او زی گروپ سے علیحدگی اختیار کر لی تھی۔

بعد ازاں نو فروری کو او زی گروپ نے 75 فیصد حصص آسٹریلیا کے Alpha Group کو فروخت کرنے کا اعلان کیا، تاہم بعد میں الفا گروپ نے کرپشن الزامات کے باعث علیحدگی اختیار کر لی۔

اب ایک بار پھر سی ڈی وینچرز کی جانب سے سیالکوٹ اسٹالیئنز کے 98 فیصد حصص کی خریداری کے بعد ٹیم کی ملکیت میں نئی تبدیلی سامنے آئی ہے۔