وزیرِ اعظم اور ڈی ایف سی کے وفد کی ملاقات، پاکستان میں سرمایہ کاری بڑھانے میں دلچسپی کا اظہار

واشنگٹن: وزیراعظم محمد شہباز شریف نے واشنگٹن میں یونائیٹڈ سٹیٹس انٹرنیشنل ڈیولپمنٹ فنانس کارپوریشن (DFC) کے چیف ایگزیکٹیو آفیسر بینجمن بلیک سے ملاقات کی، جس میں پاکستان میں امریکی سرمایہ کاری کے فروغ اور مستقبل کے اسٹریٹجک منصوبوں پر تبادلہ خیال کیا گیا۔ ملاقات میں ڈی ایف سی کے چیف انویسٹمنٹ آفیسر کونر کولمین اور دیگر سینئر حکام بھی موجود تھے۔

وزیراعظم نے پاکستان میں روزگار کے مواقع اور پیداواری صلاحیت بڑھانے کے لیے ڈی ایف سی کے کلیدی کردار کی تعریف کی۔ انہوں نے ملک میں میکرو اکنامک استحکام اور ساختی اصلاحات کے ذریعے سرمایہ کاری کے لیے فراہم کردہ پرکشش ماحول کا تذکرہ کرتے ہوئے ڈی ایف سی کو دعوت دی کہ وہ توانائی، کان کنی، زراعت اور انفارمیشن ٹیکنالوجی (IT) کے شعبوں میں اپنی فنانسنگ کو مزید وسعت دے۔

ملاقات کے دوران وزیراعظم نے ڈی ایف سی کے موجودہ ایک ارب ڈالر سے زائد کے پورٹ فولیو کو سراہا اور اسے دونوں ممالک کے درمیان معاشی شراکت داری کا مضبوط ثبوت قرار دیا۔ انہوں نے ڈی ایف سی کی قیادت کو اپریل میں اسلام آباد میں منعقد ہونے والی بین الاقوامی معدنیات کانفرنس میں شرکت کی باقاعدہ دعوت بھی دی۔

بینجمن بلیک نے وزیراعظم کو ڈی ایف سی کی ترجیحات سے آگاہ کرتے ہوئے پاکستان میں سرمایہ کاری بڑھانے میں گہری دلچسپی ظاہر کی۔ انہوں نے کہا کہ ڈی ایف سی پاکستان کی معاشی ترقی کی حمایت اور نجی شعبے کے اشتراک سے اہم منصوبوں کو پایہ تکمیل تک پہنچانے کے لیے تیار ہے۔