لاہور ہائیکورٹ: پنجاب بھر کے ہسپتالوں میں وینٹی لیٹرز کی تفصیلات طلب

لاہور ہائی کورٹ نے پنجاب میں خسرہ کے باعث ہونے والی ہلاکتوں پر تشویش کا اظہار کرتے ہوئے صوبے بھر کے سرکاری ہسپتالوں میں موجود وینٹی لیٹرز کی مکمل تفصیلات طلب کر لی ہیں۔

جسٹس اویس خالد نے کیس کی سماعت کی، جس کے دوران جوڈیشل ایکٹوازم پینل کے وکیل اظہر صدیق نے دلائل دیتے ہوئے مؤقف اپنایا کہ ماضی میں خسرہ اور ڈینگی جیسی بیماریوں سے سینکڑوں قیمتی جانوں کا ضیاع ہوا۔ انہوں نے عدالت کو بتایا کہ ہسپتالوں میں بنیادی طبی سہولیات اور وینٹی لیٹرز کی عدم دستیابی اموات کی بڑی وجہ بنی، اگر بروقت سہولیات فراہم کی جاتیں تو ان جانوں کو بچایا جا سکتا تھا۔

سماعت کے دوران ڈی جی موذی امراض پنجاب نے ابتدائی رپورٹ عدالت میں پیش کی۔ درخواست گزار نے استدعا کی کہ عدالت خسرہ سے ہونے والی اموات کی اعلیٰ سطح پر تحقیقات کا حکم دے تاکہ ذمہ داران کا تعین ہو سکے۔ عدالت نے ریمارکس دیے کہ شہریوں کی زندگی کا تحفظ ریاست کی اولین ذمہ داری ہے۔ کیس کی مزید سماعت 27 فروری تک ملتوی کر دی گئی ہے، جس میں حکومت کو وینٹی لیٹرز کی تعداد اور ان کی ورکنگ کنڈیشن پر رپورٹ جمع کروانا ہوگی۔