لندن کے پہلے مسلم میئر صادق خان کا رمضان کے استقبال پر خصوصی اعلان

لندن: پاکستانی نژاد صادق خان، لندن کے پہلے مسلم میئر، نے ماہِ رمضان کے استقبال کے لیے شہر کی اہم سڑکوں کو روشنیوں سے سجانے کا اعلان کیا ہے، جس سے شہریوں کے دل جیت لیے ہیں۔

ترک میڈیا کے مطابق میئر صادق خان نے بتایا کہ اس برس بھی پیکاڈلی سرکس اور لیسٹر اسکوائر کو ملانے والی کوونٹری اسٹریٹ 30 ہزار ایل ای ڈی لائٹس سے شام 5 بجے سے صبح 5 بجے تک روشن رہے گی۔ یہ سلسلہ رمضان کے دوران مسلسل چوتھے سال جاری ہے۔

صادق خان نے انسٹاگرام پر ویڈیو میں کہا کہ رمضان ایمان کی تجدید، ضرورت مندوں کی مدد اور سماجی اقدار کو فروغ دینے کا وقت ہے۔ میئر نے لندن میں مقیم مسلمان شہریوں کی سخاوت اور خیرات کی تعریف کی اور سب شہریوں کو رمضان کی مبارکباد دی۔

میئر نے زور دیا کہ لندن میں اختلافات کے باوجود شہری ایک دوسرے کے ساتھ محبت اور احترام کے ساتھ رہتے ہیں، اور یہ اقدار شہر کے اتحاد کی بنیاد ہیں۔