پنجاب حکومت نے عمران خان اور بشریٰ بی بی کی ضمانت کیخلاف اپیلیں واپس لے لیں

سپریم کورٹ میں پنجاب حکومت نے بانی تحریک انصاف عمران خان اور بشریٰ بی بی کی ضمانت کے خلاف اپیلیں واپس لے لیں۔ سرکاری وکیل نے عدالت کو بتایا کہ انہیں ہدایات موصول ہوئی ہیں کہ ضمانت کے خلاف اپیلیں واپس لی جائیں۔

عدالت نے بانی پی ٹی آئی عمران خان کی 9 مئی کے مقدمات میں ضمانت منسوخی کی اپیلیں واپس لینے کی بنیاد پر نمٹا دیں۔

دریں اثنا سپریم کورٹ میں سائفر کیس کی اپیل بھی بغیر کارروائی ملتوی کر دی گئی۔ پراسیکیوٹر جنرل نے بتایا کہ کیس کا تفصیلی فیصلہ جمع نہیں کرایا گیا، اس لیے مہلت دی جائے۔ اس موقع پر بیرسٹر سلمان صفدر روسٹرم پر آئے، جس پر جسٹس ہاشم کاکڑ نے استفسار کیا کہ آپ کیا کر رہے ہیں؟

بیرسٹر سلمان صفدر نے کہا کہ وہ عدالت میں موجود تھے مگر انہیں اس کیس میں نوٹس نہیں ہوا۔ جسٹس ہاشم کاکڑ نے ریمارکس دیئے کہ اگر آپ چاہتے ہیں تو آپ کو نوٹس کر دیا جائے، لیکن ابھی یہ طے نہیں ہوا کہ اپیل قابل سماعت ہے یا نہیں۔

بعد ازاں عدالت نے تفصیلی فیصلہ جمع کرانے کی مہلت دیتے ہوئے سماعت کو غیر معینہ مدت کے لیے ملتوی کر دیا۔