پاکستان ہاکی ٹیم کا فیڈریشن کے خلاف احتجاج ، واجبات اور بدانتظامی پر سخت ردعمل

قومی ہاکی ٹیم نے لاہور میں پریس کانفرنس کرتے ہوئے پاکستان ہاکی فیڈریشن کی انتظامی نااہلی اور وعدہ خلافیوں کو منظر عام پر لے آیا۔ کپتان عماد بٹ نے کہا کہ پانچ دن بعد ورلڈ کپ کوالیفائنگ راؤنڈ کھیلنا ہے مگر ایسے حالات میں کارکردگی دکھانا مشکل ہے۔

انہوں نے بتایا کہ ٹیم کو بیرون ملک ٹور کے دوران شدید مشکلات کا سامنا کرنا پڑا۔ آسٹریلیا میں ہوٹل بکنگ نہ ہونے کے باعث کھلاڑیوں کو مشکلات جھیلنا پڑیں اور کئی اخراجات اپنی جیب سے ادا کرنا پڑے۔

کھلاڑیوں کا کہنا تھا کہ 2023 کے الاؤنسز سمیت لاکھوں روپے واجب الادا ہیں، جبکہ فیڈریشن کی جانب سے کیے گئے وعدے پورے نہیں کیے گئے۔ محمد حنان نے کہا کہ سینئرز کو ٹیم اور بورڈ کے درمیان پل کا کردار ادا کرنا چاہیے تھا۔

رانا وحید نے انکشاف کیا کہ انجری کے بعد وطن واپسی پر بھی فیڈریشن کی جانب سے کوئی رابطہ نہیں کیا گیا۔

کپتان عماد بٹ نے واضح کیا کہ ٹیم متحد ہے، مگر موجودہ مینجمنٹ برقرار رہی تو کھلاڑی ہاتھ کھڑے کرنے پر مجبور ہوں گے۔ انہوں نے زور دیا کہ ہاکی کی بہتری کے لیے میرٹ پر تعلیم یافتہ افراد کو ذمہ داریاں سونپی جائیں اور غیر ملکی کوچ تعینات کیا جائے۔