امریکی فوج ایران کے خلاف ممکنہ طویل جنگ کی تیاری کر رہی ہے: غیرملکی خبر ایجنسی

غیر ملکی خبرایجنسی کی رپورٹ کے مطابق امریکی فوج صدر ڈونلڈ ٹرمپ کے حکم پر ایران کے خلاف ممکنہ طویل جنگ کی تیاری کر رہی ہے، جس کے نتیجے میں دونوں ممالک کے درمیان ماضی کے مقابلے میں شدید کشیدگی پیدا ہو سکتی ہے۔

رپورٹ میں بتایا گیا کہ عہدیداروں نے حساسیت کے پیش نظر اپنی شناخت ظاہر نہ کرنے کی شرط پر کہا کہ اگر صدر ٹرمپ ایران پر حملے کا حکم دیتے ہیں تو فوج اس پر فوری عمل درآمد کرے گی۔

رپورٹ کے مطابق موجودہ منصوبہ بندی کافی پیچیدہ ہے اور حملے کی صورت میں امریکی فوج ایرانی جوہری تنصیبات کے ساتھ ساتھ ریاستی اور سلامتی کی تنصیبات کو بھی نشانہ بنا سکتی ہے۔ تاہم، عہدیداروں نے مخصوص تفصیلات فراہم کرنے سے انکار کیا۔

انہوں نے مزید کہا کہ ایران کے ممکنہ جوابی اقدامات کے باعث وقت کے ساتھ دونوں جانب سے جوابی حملوں اور انتقامی کارروائیوں کا سلسلہ شروع ہو سکتا ہے۔

وائٹ ہاؤس کی ترجمان اینا کیلی نے اس حوالے سے کہا کہ صدر ٹرمپ نے ایران کے خلاف تمام آپشنز کھلے رکھے ہیں اور حتمی فیصلہ ملک اور قومی سلامتی کے مفاد کو مدنظر رکھتے ہوئے کیا جائے گا۔