ٹی ٹوئنٹی ورلڈکپ، پاک بھارت ہائی وولٹیج ٹاکرااتوار کو ہوگا، بارش کی انٹری کا خدشہ

انتظارکی گھڑیاں ختم۔ کرکٹ کی دنیا کا ہائی وولٹیج ٹاکرا اتوارکو ہوگا۔ آئی سی سی مینز ٹی ٹوئنٹی ورلڈکپ 2026 میں روایتی حریف پاکستان اور بھارت کا اہم میچ سری لنکن دارالحکومت کولمبوکے پریماداسااسٹیڈیم میں کھیلاجائے گا۔

دونوں ٹیموں کی جانب سے بھرپور تیاری کی گئی ہے۔تاہم ہفتے کو دونوں ٹیموں کا پریکٹس سیشن بارش سے متاثرہوا۔ اور اب کرکٹ کے دیوانوں کےلیے بری خبریہ ہے کہ غیر متوقع موسم کی وجہ سے پاک بھارت میچ متاثر ہونے کا خدشہ ہے۔

سری لنکن محکمہ موسمیات نے خبردار کیا ہے کہ کولمبومیں کم دباؤ کانظام بن رہاہے جس کے باعث اتوار کو بارش کا امکان ہے۔ محکمہ موسمیات کے دن کے آغاز میں موسم گرم اور حبس زدہ رہنے کی توقع ہے، جبکہ درجہ حرارت تقریباً 30 سے 31 ڈگری سینٹی گریڈ تک جا سکتا ہے۔

تاہم دوپہر کے دوران مختلف اوقات میں گرج چمک کے ساتھ بارش کی پیش گوئی  ہے۔ بارش کے امکانات 50 سے 70 فیصد بتائے جا رہے ہیں۔

پاک بھارت میچ مقامی وقت کے مطابق شام 7 بجے اورپاکستانی وقت کے مطابق شام ساڑھے 6 شروع ہونا ہے، لیکن کچھ موسمی ماڈلز کے مطابق میچ کےآغاز سے پہلے شدید بارش ہو سکتی ہے، جس کے نتیجے میں ٹاس میں تاخیر یا میچ کے اوورز کم ہونے کا بھی خدشہ ہے۔

کچھ پیش گوئیاں کولمبو میں رات 8 بجے کے بعد موسم میں معمولی بہتری کی نشاندہی کرتی ہیں، تاہم رات بھر وقفے وقفے سے بارش کے امکانات برقرار رہیں گے۔میچ بارش کی نذر ہو جاتا ہے تو پاکستان اور بھارت دونوں کو ایک، ایک پوائنٹ دیا جائے گا.