وزیرِ خزانہ محمد اورنگزیب کا چوتھی کلائمیٹ کانفرنس سے ویڈیو خطاب،موسمیاتی تبدیلی پاکستان کے لیے بڑا چیلنج

اسلام آباد: وزیرِ خزانہ محمد اورنگزیب نے چوتھی کلائمیٹ کانفرنس سے ویڈیو خطاب میں کہا ہے کہ موسمیاتی تبدیلی پاکستان کے لیے ایک بڑا چیلنج بن چکی ہے۔ انہوں نے 2022 کے تباہ کن سیلاب کا حوالہ دیتے ہوئے بتایا کہ اس نے ملک کو شدید معاشی نقصان پہنچایا۔ علاوہ ازیں، سال 2025 میں تین دریاؤں کے سیلاب نے تقریباً تمام صوبوں کو متاثر کیا۔

وزیرِ خزانہ نے کہا کہ پاکستان موسمیاتی تبدیلی کے اثرات سے نمٹنے کے لیے بقاء کی جنگ کے دہانے پر کھڑا ہے اور مختلف اقدامات کیے جا رہے ہیں۔ انہوں نے بتایا کہ فنڈنگ ایک چیلنج ہے، لیکن موجودہ فنڈز کو مؤثر طریقے سے استعمال کیا جا رہا ہے۔

محمد اورنگزیب کے مطابق پاکستان کے پاس آئی ایم ایف کا 1.3 ارب ڈالر کا کلائمیٹ فنڈ دستیاب ہے، جبکہ ورلڈ بینک اور ایشیائی ترقیاتی بینک کی کلائمیٹ فیسیلیٹی بھی موجود ہے۔ انہوں نے کہا کہ شرم الشیخ میں طے شدہ اقدامات ابھی تک مکمل طور پر نافذ نہیں ہوئے۔

وزیرِ خزانہ نے بتایا کہ کیپیٹل مارکیٹس میں گرین بانڈز اور گرین سکوک جاری کیے گئے ہیں اور پانڈا بانڈز کا بھی اجراء کیا جا رہا ہے۔ انہوں نے زور دیا کہ موسمیاتی تبدیلی سے نمٹنے میں سب سے اہم کردار نجی شعبے کا ہے۔

محمد اورنگزیب نے کہا کہ موجودہ فنڈز کو بروئے کار لانے کے لیے کیپیسیٹی بلڈنگ ضروری ہے اور پبلک پرائیویٹ پارٹنرشپ جیسے ٹھوس اقدامات کے ذریعے موسمیاتی خطرات کو کم کیا جا سکتا ہے۔