سعودی عرب میں پاکستانی آئی ٹی ماہرین کے لیے مواقع میں اضافہ

سعودی عرب کے تیزی سے ترقی پذیر ٹیکنالوجی سیکٹر میں پاکستانی آئی ٹی ماہرین کے لیے مواقع بڑھ گئے ہیں۔ ویژن 2030 کے تحت ملک میں جاری بڑے ترقیاتی منصوبوں کے باعث مصنوعی ذہانت، سائبر سیکیورٹی، آٹومیشن اور سافٹ ویئر ڈویلپمنٹ کے شعبوں میں غیر ملکی ماہرین کی طلب مسلسل بڑھ رہی ہے۔

ماہرین کے مطابق پاکستان اور سعودی عرب کے درمیان اسٹریٹجک تعاون، ہدفی مہارت سازی کے پروگرامز اور ادارہ جاتی شراکت داری کو فروغ دینا اس موقع سے فائدہ اٹھانے کے لیے ضروری ہے۔ سرکاری اعداد و شمار کے مطابق 2025 میں سعودی عرب میں مقیم پاکستانی کارکنوں کی تعداد 5 لاکھ 30 ہزار 256 تک پہنچ گئی، جو گزشتہ سال کے مقابلے میں 17 فیصد زیادہ ہے۔

سعودی کمپنیاں غیر ملکی ماہرین کو پرکشش تنخواہوں، ویزا اسپانسر شپ اور دیگر مراعات فراہم کر رہی ہیں، جبکہ حساس شعبوں جیسے سائبر سیکیورٹی میں پاکستانی ماہرین کو ترجیح دی جا سکتی ہے۔ علاوہ ازیں پاکستانی آئی ٹی کمپنیوں نے سعودی عرب میں ذیلی دفاتر قائم کر رکھے ہیں اور عملے کو وہاں منتقل کیا جا رہا ہے۔

ماہر تعلیم ڈاکٹر نعمان سعید کا کہنا ہے کہ پاکستان کو تعلیمی نظام کو عالمی معیار کے مطابق ڈھالنا ہوگا اور آئی ٹی جامعات و صنعتی اداروں کے درمیان تعاون ناگزیر ہے۔