دسمبر 2025 میں روشن ڈیجیٹل اکاؤنٹس میں 21.3 کروڑ ڈالر جمع، سالانہ بیلنس 25 فیصد بڑھ گیا

کراچی: اسٹیٹ بینک کے تازہ اعداد و شمار کے مطابق دسمبر 2025ء میں روشن ڈیجیٹل اکاؤنٹس میں 21 کروڑ 30 لاکھ ڈالر جمع کروائے گئے، جس سے ماہانہ 18 فیصد اور سالانہ 5 فیصد نمو ریکارڈ کی گئی۔

دسمبر میں 10 ہزار 93 نئے اکاؤنٹس کھولے گئے، جس کے بعد روشن ڈیجیٹل اکاؤنٹس کی مجموعی تعداد 8 لاکھ 93 ہزار 130 ہو گئی۔ مجموعی بیلنس سالانہ 25 فیصد اضافے کے ساتھ 11.7 ارب ڈالر تک پہنچ گیا۔

آغاز سے دسمبر 2025 تک روشن ڈیجیٹل اکاؤنٹس کے 7 ارب 53 کروڑ ڈالر پاکستان میں استعمال ہوئے جبکہ 1 ارب 94 کروڑ 30 لاکھ ڈالر منافع بیرونِ ملک واپس گیا۔ اس دوران خالص قابل واپسی ذمہ داری 2 ارب 23 کروڑ ڈالر ریکارڈ کی گئی۔

اسٹیٹ بینک نے کہا ہے کہ روشن ڈیجیٹل اکاؤنٹس نے بیرونِ ملک پاکستانی سرمایہ کاری کے لیے محفوظ اور شفاف پلیٹ فارم فراہم کیا ہے۔