حکومت ایکسپورٹ اور ٹیکس نیٹ بڑھانے کی کوشش کر رہی ہے: احسن اقبال

وفاقی وزیر منصوبہ بندی احسن اقبال نے کہا ہے کہ حکومت ملکی ترقی اور معیشت کی پائیداری کے لیے ایکسپورٹ اور ٹیکس نیٹ ورک میں اضافہ کی کوشش کر رہی ہے۔

ساہیوال کے نواحی گاؤں 90 سکس آر میں نارووال یونیورسٹی کی وائس چانسلر کی والدہ کی وفات پر تعزیت کے بعد میڈیا سے گفتگو کرتے ہوئے احسن اقبال نے کہا کہ حکومت اور اسٹیبلشمنٹ دنیا میں جاری کشیدہ صورتحال خصوصاً ایران اور امریکہ کے معاملات پر نظر رکھے ہوئے ہیں۔

انہوں نے بتایا کہ عالمی سطح پر پائیدار امن یا مستحکم نظام کے لیے پچھلے سو سالوں میں جو قوانین وضع کیے گئے تھے، وہ غیر مؤثر ثابت ہو گئے ہیں۔ اس طوفان سے بچنے کے لیے حکومت محتاط انداز میں ملکی کشتی کو محفوظ راستے پر لے جانے کی کوشش کر رہی ہے۔

وفاقی وزیر نے کہا کہ حکومت کو کسانوں کا پورا احساس ہے، مگر ملک میں دہشت گردی کو ختم کرنے اور افغان بارڈر کو محفوظ بنانے کے لیے سخت اقدامات کیے گئے ہیں۔ کسان اور زرعی معیشت کو بہتر بنانے کے لیے چین سمیت دیگر ممالک کے ساتھ رابطے جاری ہیں۔

انہوں نے مزید کہا کہ پاکستان کی معیشت تین سال قبل دیوالیہ ہونے کے قریب تھی، اور حکومت کی کوشش ہے کہ تجارتی اور ٹیکس نیٹ ورک میں اضافہ کر کے معیشت کو مضبوط بنایا جائے۔